DiverDeSa 2010

O concello da Estrada xunto co club de Loitas Tradicionais A Cambadela veñen de presentar o que agardamos que sexa o acontecemento deportivo do verán. Durante os días 10 e 11 de xullo celebrarase na praia fluvial do río Liñares DiverDeSa 2010 (Diversión Deporte e Saúde), macroxuntanza deportivo-cultural na que se contará, entre outras cousas,  con mostras, exhibicións e competicións de máis de corenta modalidades deportivas.

O evento deuse a coñecer onte xoves en rolda de prensa na que participaron o concelleiro de deportes Xoán Carlos Castro, o presidente do club A Cambadela Moisés Iglesias e o alma máter do proxecto de rescate da Loita Tradicional Galega, así coma Director Técnico do club A Cambadela, Severino Gómez.

Rolda de prensa

DiverDeSa 2010 pretende centrarse sobre todo no aspecto lúdico da práctica deportiva. Serán dous días de festa que xirarán arredor do deporte pero nas que tamén haberá momentos para os xogos tradicionais, a cultura, a música, a diversión para os nenos, a boa comida e un sen fin de outras actividades nas que poder aproveitar o día no marco incomparable da praia fluvial do río Liñares.

Tamén é interesante resaltar o II Encontro de Loitas da Estrada. Mentres que o ano pasado se celebrou durante as festas de San Paio, este ano incluirase dentro das propostas de DiverDeSa 2010. Contaremos con varias delegacións de loitas autóctonas (lucha leonesa, lucha canaria, aluche cántabro, galhofa portuguesa e por suposto Loita Tradicional Galega) así coma con representación de loitas olímpicas, karate e grappling. Haberá exhibición e talleres para os máis valentes.

Ven e participa en DiverDeSa 2010!!

Advertisements

Presentación unidade didáctica e manual de loita

Onte martes día 26 de maio tivo lugar no concello da Estrada a presentación da unidade didáctica A loita dos nosos antergos: Unha proposta didáctica xunto co primeiro Manual práctico de Loita Tradicional Galega.

O material foi presentado polo presidente do club, Moisés Iglesias, xunto co Director Técnico, Severino Gómez. Contamos así mesmo coas palabras de D. Xoán Carlos Castro, o concelleiro de deportes do da Estrada, e de Dna. Marta Souto, anteriora Directora Xeral para o Deporte. A ámbolos dous estaremos sempre agradecidos polo seu apoio xa dende o comezo da andaina da Cambadela.

A unidade didáctica está enfocada ao profesorado de Educación Física. Aínda que o encaixe curricular está desenvolvido para primaria, a maior parte da proposta é de utilidade tamén para o nivel de secundaria.  Se a descargades e vos animades a levala a aula, gustaríanos saber que tal foi a experiencia: Se vos resultou útil, que pensades que deberiamos cambiar,  que botastes en falla, etc. Calquera suxerencia ou comentario construtivo será moi ben recibido.

Cazador de palabras

O pasado 15 de xaneiro comezou un novo programa na Televisión de Galicia que leva por título Cazador de palabras. O nexo de unión da primeira emisión foi o deporte, adicando unha boa parte ao fútbol (non podía ser doutra maneira).

Pero o máis importante, faltaría máis, foi que adicaron a segunda parte do programa a algúns dos deportes tradicionais, en particular á billarda e á… Loita Tradicional Galega. Sí, estivemos na tele!. É un orguio e unha grande satisfación saber que a nosa loita se empeza a coñecer e esperta interese, incluso dos medios de comunicación.

Foi unha experiencia moi interesante. Viñeron a gravar xa hai uns meses, tedes que ter en conta que este tipo de programas grávanse con moita antelación e supoñemos que terán despois un labor importante de montaxe, realización, etc. Estiveron no local do club durante boa parte da tarde, gravaron aos nenos loitando e, mentras lle facían a entrevista a Severino (o noso director técnico), había unha parella de loitadores facendo unha demostración técnica. Xa era noite cando rematamos.

Non nos queda máis que felicitar aos responsábeis do programa e comunicarlles o noso agradecemento. A emisión que saíu pola tele foi moi dinámica, divertida e amena e, o máis importante, cun incalculábel valor  lingüístico. A parte correspondente aos deportes tradicionais foi algo curta, pero hai que ter en conta que a temática desta primeira emisión era moi ampla e o tempo de programa é limitado.

Xa sabedes, para poder seguilo, os xoves ás 21:45 horas na Televisión de Galicia.

Tamén podedes ver os programas anteriores ná páxina da galega no apartado Televisión á Carta.