Fotos Diverdesa 2011

Xa temos fotos do Diverdesa 2011. Despois de tomarnos un respiro durante o verán, xa estamos aquí de novo para informarvos das actividades que se vaian realizando e das novas relacionadas coa Loita Tradicional Galega.

Aquí tedes unha selección de fotos, moitas máis no seguinte álbum de fotos.

Motocross no Diverdesa 2011

Xogos tradicionais

Defensa persoal

Loita Tradicional Galega

 

Advertisements

Encontro de loitas en León

A comunidade de Castela e León está inmersa agora nas celebracións do 1100 aniversario do Reino de León. Con ese gallo teñen multitude de actividades: Exposicións, música, conferencias, actividades audiovisuais, recitais, etc. No que a nós nos atinxe, e dentro destas celebracións, tivo lugar na primeira fin de semana deste mes de outubro un encontro internacional de loitas, no que a Loita Galega estivo como invitada. Houbo presenza de delegacións de Canarias, Bretaña, Escocia, Cerdeña, Grecia, Cantabria, Islandia, León e Galicia.

O encontro comezou o venres día 1 de outubro. Durante a mañá tivemos varias conferencias sobre diversos aspectos das loitas autóctonas, así coma a proxección dun vídeo promocional sobre a Lucha Leonesa. Foi para nós especialmente interesante a breve charla de Fulgencio Fernández sobre a situación actual da Lucha Leonesa, os problemas que ten que afrontar e a clave que para el supuña considerar a esta actividade como sinal de identidade.

Xa pola tarde dese mesmo día tivemos talleres sobre as diversas loitas congregadas no encontro. Dado que ao seguinte día se ía loitar en Lucha Leonesa, Lucha Canaria, Gouren e Backhold, foron estas loitas as que acapararon maior atención dos participantes. O taller de Loita Galega foi o último da xornada, cando xa estabamos todos un pouco cansos do intenso día, pero aínda así houbo un nutrido grupo de loitadores que atenderon ás nosas explicacións.

A xornada do sábado día 2 foi de competicións. Pola mañá fíxose competición de loitas autóctonas, coas especialidades que nomeamos antes, e cun sistema baseado en que que cada loitador podía escoller o tipo de loita a empregar. Así, cada parella facía dous combates, de distintas loitas e, en caso de empate, había que facer un novo combate noutra especialidade. Por desgraza Miguel Pereira, o noso representante, chegou a esta xornada lesionado e tivo que retirarse sen completar os dous combates.

Na tarde do sábado tivo lugar un corro de Lucha Leonesa, na que puideron participar así mesmo tódolos loitadores que viñeran coas diversas delegacións de loitas autóctonas. Como é de supor, os participantes leoneses gañaron en case tódalas categorías, a pesares do grande nivel de adversarios aos que se tiveron que enfrontar.

Dicir que a organización nos brindou un trato exquisito. Agradecemos profundamente a invitación que nos fixeron os nosos amigos leoneses, e agradecemos especialmente a Antonio Barreñada, auténtico motor de toda esta actividade.

Diverdesa 2010

Pois si, xa rematou o Diverdesa 2010. Durante o sábado e o domingo estivemos todos na praia fluvial do río Liñares, na Estrada, gozando con demostracións deportivas, talleres, xogos tradicionais, inchables, festa da espuma e moito máis. Dous días que nos parece que marcan un antes e un despois no mundo deportivo da Estrada.

En realidade o que pasou esta fin de semana foi a culminación dun longo e laborioso traballo. Tedes que ter en conta que é moi difícil organizar un acontecemento deste tipo, poñer de acordo á maioría dos clubs deportivos do concello, conseguir traer as distintas delegacións de loita, planificar as actividades, repartir as zonas, conseguir agasallos e trofeos e moitas outras cousas que nos obrigaron a ter controlados tódolos detalles.

Debemos dicir que todo isto non sería posible sen a permanente colaboración de Xoán Carlos Castro, o concelleiro de deportes, que nos demostrou que cando un ten as ideas claras e non escatima en esforzos ao final chega a recompensa. Algo que, por desgraza, non podemos dicir dalgún outro membro da corporación municipal.

Dende o club A Cambadela temos que darlle ademais unha importancia especial ao II Encontro de Loitas, onde conseguimos reunir a delegacións de León, Canarias, Portugal, Loitas Libre Olímpica, Loita Grecorromana e por suposto Loita Tradicional Galega. Dous fitos nos gustaría remarcar desta edición: Por un lado a presenza da Galhofa, a loita do norte de Portugal, coa delegación do Profesor José Bragada, e por outro lado a presenza dunha delegación de Lucha Canaria. Contamos ademais, para dignificar o evento, cos presidentes da Federación de Lucha Canaria, da Federación de Lucha Leonesa e da Federación Galega de Loita. Todo un honor para nós!.

Podedes ver máis fotos na seguinte dirección web: http://bit.ly/bVkbY9

Un día para o Diverdesa 2010

Como xa vos dixemos fai un tempo, esta fin de semana terá lugar o Diverdesa 2010, na praia fluvial do río Liñares, na Estrada. Todo está preparado para este macro-acontecemento deportivo-cultural. Teremos de todo como podedes ver na súa páxina web, un montón de disciplinas deportivas farán demostracións, exhibicións e haberá competicións dalgunhas outras.

Para nós os loitadores é de destacar o II Encontro de Loitas da Estrada. A parte das delegacións que tivemos o ano pasado (Loitas Olímpicas, Lucha Leonesa, Karate e Loita Tradicional Galega) este ano contaremos ademais con loitadores canarios e, por primeira vez en Galicia, cunha delegación do norte de Portugal, que nos mostrarán a Galhofa, da que xa falamos aquí noutras ocasións.

O máis importante, sen ningún tipo de dúbida, vai ser o carácter lúdico deste evento. Preténdese que a xente que se achegue á praia do río Liñares se divirta, poida participar en múltiples talleres e xogos e acabe estas dúas xornadas cunha profunda satisfacción e con maior amor se cabe aos deportes de base.

Para ter  máis información está creado un perfil en Facebook e tamén podes seguir as entradas de Twitter.

Vémonos en Diverdesa!!

DiverDeSa 2010

O concello da Estrada xunto co club de Loitas Tradicionais A Cambadela veñen de presentar o que agardamos que sexa o acontecemento deportivo do verán. Durante os días 10 e 11 de xullo celebrarase na praia fluvial do río Liñares DiverDeSa 2010 (Diversión Deporte e Saúde), macroxuntanza deportivo-cultural na que se contará, entre outras cousas,  con mostras, exhibicións e competicións de máis de corenta modalidades deportivas.

O evento deuse a coñecer onte xoves en rolda de prensa na que participaron o concelleiro de deportes Xoán Carlos Castro, o presidente do club A Cambadela Moisés Iglesias e o alma máter do proxecto de rescate da Loita Tradicional Galega, así coma Director Técnico do club A Cambadela, Severino Gómez.

Rolda de prensa

DiverDeSa 2010 pretende centrarse sobre todo no aspecto lúdico da práctica deportiva. Serán dous días de festa que xirarán arredor do deporte pero nas que tamén haberá momentos para os xogos tradicionais, a cultura, a música, a diversión para os nenos, a boa comida e un sen fin de outras actividades nas que poder aproveitar o día no marco incomparable da praia fluvial do río Liñares.

Tamén é interesante resaltar o II Encontro de Loitas da Estrada. Mentres que o ano pasado se celebrou durante as festas de San Paio, este ano incluirase dentro das propostas de DiverDeSa 2010. Contaremos con varias delegacións de loitas autóctonas (lucha leonesa, lucha canaria, aluche cántabro, galhofa portuguesa e por suposto Loita Tradicional Galega) así coma con representación de loitas olímpicas, karate e grappling. Haberá exhibición e talleres para os máis valentes.

Ven e participa en DiverDeSa 2010!!

Ourense co Senegal

O Senegal independizouse de Francia alá polo ano 1960, despois de máis de cen anos de colonización. Isto significa que este 2010 fai 50 anos que existe como país. Co gallo deste acontecemento os senegaleses que viven en Ourense veñen de organizar ao longo deste mes de abril unha serie de actividades  conmemorativas que incluíron conferencias, eventos deportivas, música e gastronomía. Foi unha boa oportunidade para achegarnos á realidade deste país, que moitas veces só coñecemos superficialmente ou incluso do que temos ideas erróneas preconcibidas.

Unha das actividades máis interesantes foi unha demostración de loita senegalesa. Esta loita, denominada Lamb (palabra wolof que significa loita) é o deporte nacional deste país. Os combates están rodeados de rituais e cánticos que lle dan unha dimensión tan cultural e mística coma deportiva. É tal a súa importancia que os grandes practicantes cobran cantidades astronómicas e os combates son seguidos polos medios de comunicación. No aspecto práctico, trátase dunha loita na que se permiten golpes aínda que, dado que o obxectivo é tirar ao adversario, os combates adoitan a rematar con traballo corpo a corpo.

Xunto coa demostración de loita Lamb o club A Cambadela fixo unha exhibición de Loita Tradicional Galega. Foi así unha xornada de interacción entre dúas culturas e dúas expresións culturais enraizadas na historia de ámbolos dous países.

Promoción da loita en Vigo

A Federación Galega de Loita e o Club A Cambadela, coa colaboración do concello de Vigo, veñen de desenvolver unhas xornadas de promoción da Loita en varios colexios de Vigo. A actividade consistíu en mañás didácticas nos propios colexios onde se realizaron sesións lúdicas de introdución ás loitas, centradas principalmente na Loita Tradicional Galega. Desta forma, o alumnado de primaria tivo un primeiro contacto  coa nosa loita de man de técnicos da Federación Galega e monitores da Cambadela.

Os centros que participaron foron:

  • CEIP Ramón y Cajal.
  • CEIP Emilia Pardo Bazán.
  • CEIP Fleming.
  • CEIP Doblada.

Promoción da loita en Vigo

Este proxecto é un paso máis no labor de promoción das loitas e de intentar achegar este tivo de actividades aos máis cativos, á vez que se informa aos pais e nais da realidade destes deportes e se eliminan certos mitos contraproducentes. Así mesmo, dáselle publicidade á escola deportiva de Loita Tradicional Galega que o concello ten interese en abrir en Vigo.

Como sempre dicimos, o que máis nos enche de orgullo é ver as caras de felicidade dos nenos e nenas que pasan por estes talleres.

loi7