Aranda de Duero

Esta fin de semana pasada viaxamos a Aranda de Duero, a un encontro internacional de xogos e deportes tradicionais. O acontecemento estivo organizado pola Asociación Cultural La Tanguilla, e foi a culminación dunha serie de actividades enfocadas á promoción do xogo e deporte tradicional, entre as que destacou a celebración dun congreso mundial de xogos tradicionais con presenza de expertos de múltiples países.

Foi unha fin de semana moi interesante, tanto dende o punto de vista deportivo coma cultural. Estivemos aloxados na localidade burgalesa de Peñaranda de Duero, pequeno concello que conserva intacto gran parte do seu patrimonio medieval entre o que destaca un castelo, o pazo de Avellaneda e en xeral tódolos edificios situadas no entorno da praza maior. As demostracións tiveron lugar en Aranda de Duero, no polideportivo Príncipe de Asturias, un complexo dotado de espazos amplos e múltiples instalacións deportivas.

Corte en altura

Dende logo, coma é habitual neste tipo de concentracións, o máis produtivo do encontro foi ter contacto coa xente que forma parte do mundo do xogo e deporte tradicional. É incrible a cantidade de persoas que loitan polo rescate e mantemento das tradicións, auténtico patrimonio cultural. Tivemos ocasión así mesmo de coñecer a Carlos de la Villa, a cabeza visible da organización e presidente da Asociación Cultural La Tanguilla, a quen agradecemos a invitación a participar e, en xeral, o trato recibido durante estes días.

Foto de grupo en Aranda

Con respecto á concentración de loitas que estaba prevista, aínda que non puideron contar coa presenza da delegación de Canarias, si puidemos intercambiar experiencias, parolar e, por suposto, loitar coa delegación de Lucha Leonesa, personificada no club Los Leones aos que mandamos un agarimoso saúdo.

En fin, parécenos que este tipo de acontecementos son completamente necesarios para manter vivos os nosos xogos e deportes tradicionais. Agardamos que se poidan repetir no futuro.

Advertisements

Encontro de loitas

O sábado pasado foi un día grande para a Loita Tradicional Galega xa que tivo lugar o primeiro torneo de Loita da era moderna. En realidade, como diciamos na anterior entrada, houbo moitas máis cousas interesantes.

O encontro contou con actividades variadas. Por un lado celebrouse un torneo de karate no que participaron nenos tanto nas modalidades de kumite coma en katas. Así mesmo, o noso campión de katas Joel López fixo unha demostración de Formas que entusiasmou ao público.

Por outro lado, e como prato forte da tarde, celebrouse o primeiro torneo San Paio de Loita Tradicional Galega. Neste participaron firmes promesas da loita, que nos asombraron coa súa destreza, empeño e seriedade no círculo vivo.

Pero o sábado non só era tempo de competición. Tamén era tempo de irmandade entre loitadores. Contamos coa presenza de expertos en loitas olímpicas, pertencentes á Federación Galega de Loita e Disciplinas Asociadas, que fixeron unha exhibición de loita grecorromana e libre olímpica completada coas explicacións técnicas do adestrador e  campión de España  Nicolás Castro. Tamén contamos coa presenza de practicantes de lucha leonesa, na compaña e baixo a tutela de Antonio Barreñada, que nos ensinaron as súas mañas e onde puidemos coñecer mellor a riqueza da súa tradición.

Para completar as demostracións os asistentes ao encontro e o público en xeral tivo a ocasión de coñecer de primeira man as sutilezas técnicas destas artes mediante a participación en talleres prácticos.

Con todos eles, participantes, monitores e asistentes estamos profundamente agradecidos e gustaríanos enviarlle un saúdo moi agarimoso.

Por suposto, para rematar o encontro houbo demostración e talleres de Loita Tradicional Galega a cargo dos membros do club A Cambadela.

Encontro de loitas na Estrada

O vindeiro sábado día 27, aproveitando que se celebran as festas patronais na Estrada, celebraremos un encontro de loitas.
Pola tarde comezaremos cun torneo de karate no que se enfrontarán participantes de Palencia e galegos. Ao remate do torneo teremos demostracións de loitas autóctonas. Contaremos coa presencia de alucheros (Cantabria), loitadores leoneses, parellas de loita libre olímpica e grecorromana e, por suposto, parellas de loita tradicional galega.
A actividade desenvolverase diante do concello e contamos coa colaboración da Federación Galega de Loita, da Asociación Europea de Karate Profesional (E.P.K.A.) e do Concello da Estrada.

Galhofa en Bragança

O pasado sábado tivemos ocasión de coñecer de forma directa a Galhofa. A Galhofa é unha loita tradicional do nordeste portugués, practicada por mozos e que actuaba a modo de iniciación na vida adulta.

galhofa

Na súa forma práctica ten certa semellanza á loita libre olímpica, aínda que dende un enfoque máis de loita autóctona. A forma de puntuar é poñer ao contrario coas costas contra o chan. É suficiente con que se toque coas costas, non fai falla manter a posición durante un tempo. Isto fai que os combates sexan moi dinámicos e que a técnica estea enfocada a tirar rapidamente ao contrario. Pareceunos unha loita moi rica, con grande variedade técnica á vez que integrada nos costumes tradicionais.

Neste momento estase intentando rescatar esta loita portuguesa, principalmente polos esforzos do profesor José Bragada, do instituto politécnico Bragança, a quen tivemos o pracer de coñecer. Por suposto, hoxe en día tamén hai practicantes femininas e semella que a Galhofa vai camiño de transformarse nun deporte organizado, á vez que mantén as fondas raigames coa tradición portuguesa.

Moitos ánimos aos nosos irmáns portuguesas practicantes da Galhofa!.

Para coñecer un pouco máis desta loita podedes botarlle un ollo a este video.