Un día para o Diverdesa 2010

Como xa vos dixemos fai un tempo, esta fin de semana terá lugar o Diverdesa 2010, na praia fluvial do río Liñares, na Estrada. Todo está preparado para este macro-acontecemento deportivo-cultural. Teremos de todo como podedes ver na súa páxina web, un montón de disciplinas deportivas farán demostracións, exhibicións e haberá competicións dalgunhas outras.

Para nós os loitadores é de destacar o II Encontro de Loitas da Estrada. A parte das delegacións que tivemos o ano pasado (Loitas Olímpicas, Lucha Leonesa, Karate e Loita Tradicional Galega) este ano contaremos ademais con loitadores canarios e, por primeira vez en Galicia, cunha delegación do norte de Portugal, que nos mostrarán a Galhofa, da que xa falamos aquí noutras ocasións.

O máis importante, sen ningún tipo de dúbida, vai ser o carácter lúdico deste evento. Preténdese que a xente que se achegue á praia do río Liñares se divirta, poida participar en múltiples talleres e xogos e acabe estas dúas xornadas cunha profunda satisfacción e con maior amor se cabe aos deportes de base.

Para ter  máis información está creado un perfil en Facebook e tamén podes seguir as entradas de Twitter.

Vémonos en Diverdesa!!

Advertisements

Enredos Bandeira

A Loita Tradicional Galega desprazouse o pasado sábado día 13 de xuño á Bandeira para festexar a segunda edición de “Enredos”, encontro de xogo e deporte tradicional promocionado polo equipo de normalización lingüística do CEIP da localidade.

Afortunadamente a choiva deu unha tregua despois dunha semana pasada por auga e os asistentes á xornada puideron enredar con xogos coma  o pano, o brilé, as carrilanas ou, a actividade estrela, a parte da exhibición de loita, que foi o torneo de tirapedras.

Dende o club A Cambadela aproveitamos ademais para facerlles unha visita aos xogadores de petanca do club da Bandeira, auténticos profesionais que xa nos aseguraron a súa asistencia no Diverdesa 2010.
Non nos queda máis que agradecer aos organizadores de Enredos 2010 que nos invitaran a colaborar na nesta fantástica actividade que agardamos que continúe en futuras edicións.

V Encontro escolar de xogos tradicionais

O sábado pasado estivemos en Lugo, no magnífico entorno do pazo de feiras e congresos, onde tivo lugar o V encontro escolar de xogos tradicionais.

Segundo nos contan os organizadores, contouse coa participación de máis de 500 escolares de 13 centros de ensino de distintos puntos do país, o que é unha clara mostra do interese que espertan os xogos e deportes populares e tradicionais entre os máis novos.

Ao igual que noutros anos, a xornada tivo dúas partes claramente diferenciadas. Pola mañá  os nenos e nenas practicaron unha ampla variedade de xogos, e pola tarde tivo lugar a actuación de Os Sete Magníficos máis un e as demostracións, entre as que se atopaba a Loita Tradicional Galega.

A exhibición de loita incluíu, como de costume, un taller final para os asistentes. A lona quedouse pequena para acoller a tantas parellas de loitadores como pretendían entrar, así que houbo que facer dúas quendas para darlle a oportunidade ao maior número posible de participantes a que tiveran un primeiro contacto coa nosa loita.

DiverDeSa 2010

O concello da Estrada xunto co club de Loitas Tradicionais A Cambadela veñen de presentar o que agardamos que sexa o acontecemento deportivo do verán. Durante os días 10 e 11 de xullo celebrarase na praia fluvial do río Liñares DiverDeSa 2010 (Diversión Deporte e Saúde), macroxuntanza deportivo-cultural na que se contará, entre outras cousas,  con mostras, exhibicións e competicións de máis de corenta modalidades deportivas.

O evento deuse a coñecer onte xoves en rolda de prensa na que participaron o concelleiro de deportes Xoán Carlos Castro, o presidente do club A Cambadela Moisés Iglesias e o alma máter do proxecto de rescate da Loita Tradicional Galega, así coma Director Técnico do club A Cambadela, Severino Gómez.

Rolda de prensa

DiverDeSa 2010 pretende centrarse sobre todo no aspecto lúdico da práctica deportiva. Serán dous días de festa que xirarán arredor do deporte pero nas que tamén haberá momentos para os xogos tradicionais, a cultura, a música, a diversión para os nenos, a boa comida e un sen fin de outras actividades nas que poder aproveitar o día no marco incomparable da praia fluvial do río Liñares.

Tamén é interesante resaltar o II Encontro de Loitas da Estrada. Mentres que o ano pasado se celebrou durante as festas de San Paio, este ano incluirase dentro das propostas de DiverDeSa 2010. Contaremos con varias delegacións de loitas autóctonas (lucha leonesa, lucha canaria, aluche cántabro, galhofa portuguesa e por suposto Loita Tradicional Galega) así coma con representación de loitas olímpicas, karate e grappling. Haberá exhibición e talleres para os máis valentes.

Ven e participa en DiverDeSa 2010!!

Ourense co Senegal

O Senegal independizouse de Francia alá polo ano 1960, despois de máis de cen anos de colonización. Isto significa que este 2010 fai 50 anos que existe como país. Co gallo deste acontecemento os senegaleses que viven en Ourense veñen de organizar ao longo deste mes de abril unha serie de actividades  conmemorativas que incluíron conferencias, eventos deportivas, música e gastronomía. Foi unha boa oportunidade para achegarnos á realidade deste país, que moitas veces só coñecemos superficialmente ou incluso do que temos ideas erróneas preconcibidas.

Unha das actividades máis interesantes foi unha demostración de loita senegalesa. Esta loita, denominada Lamb (palabra wolof que significa loita) é o deporte nacional deste país. Os combates están rodeados de rituais e cánticos que lle dan unha dimensión tan cultural e mística coma deportiva. É tal a súa importancia que os grandes practicantes cobran cantidades astronómicas e os combates son seguidos polos medios de comunicación. No aspecto práctico, trátase dunha loita na que se permiten golpes aínda que, dado que o obxectivo é tirar ao adversario, os combates adoitan a rematar con traballo corpo a corpo.

Xunto coa demostración de loita Lamb o club A Cambadela fixo unha exhibición de Loita Tradicional Galega. Foi así unha xornada de interacción entre dúas culturas e dúas expresións culturais enraizadas na historia de ámbolos dous países.

Eulogio de Visantoña

Eulogio
A recuperación da Loita Tradicional Galega comezou aló polos anos oitenta. Xa sabían aqueles pioneiros que non era unha tarefa sinxela pois quedaba pouca xente que loitara na súa xuventude ou que puidese dar cumprida información de como se desenvolvía a actividade. O traballo constante e, sobre todo, o entusiasmo que puxeron posibilitou, non obstante, que a Loita se puidese sacar do esquecemento e volvese á vida.

Se vos contamos sobre as dificultades que houbo naqueles primeiros tempos é para que entendades a ledicia que tivemos cando José Manuel López nos falou do seu pai, Eulogio López González, auténtico campión de loitadores na zona de Visantoña. Hai uns días tivemos o pracer de coñecelo persoalmente e puidemos comprobar que, a parte de gran loitador, tamén é unha fantástica persoa. A súa alegría, hospitalidade e retranca fíxonos pasar unha fantástica tarde nunha compaña inmellorable.

Con máis de oitenta anos ás súas costas, Eulogio aínda mantén unha sorprendente vitalidade. Naquela zona desenvolvíase un tipo de loita de agarre fixo, á que se referían co verbo abarcar, termo que tamén temos recollido na comarca de Samos e que cita por exemplo José Santiago Crespo Pozo na súa Nueva contribución a un Vocabulario Castellano-Gallego: con
indicación de fuentes e inclusión del gallego literario
(galaico-portugués).
A característica principal deste tipo de loita é que non se permitían mañas por debaixo dos cadrís.

Certamente, a xornada con Eulogio sóubonos a pouco, e agardamos poder volver a falar con el para que nos ilustre coas súas historias da mili (onde por certo tamén loitaba) e nos ensine algunha das súas mañas. Quede esta entrada como homenaxe e mostra de aprecio e respecto para este loitador que nos impresionou profundamente.

Dinamizadores rurais

O pasado sábado día 21 estivemos na Capela. É curioso, xa que o núcleo no que está o concello, As Neves, non ten o mesmo nome que o propio concello. Pero non estamos aquí para falar de xeografía. A razón pola que nos desprazamos á Capela foi para asistir a unha xuntanza de dinamizadores rurais organizada pola Universidade Rural Galega.

Ante todo foi unha oportunidade para tomar contacto con outra xente que traballan no empeño de revitalizar o rural galego, atopar puntos de conexión, analizar a situación actual, ver que camiños e liñas de traballo futuro se poden seguir e pasar un día agradable no marco incomparable do Museo Etnográfico da Capela.

As sesións de traballo da mañá estiveron divididas en catro bloques, que os organizadores deron en chamar fendas:

  • Fendas na cultura.
  • Fendas no social.
  • Fendas na economía.
  • Fendas no medio ambiente.

A verdade é que a participación dos asistentes foi moi interesante, con diversos puntos de vista pero nun ambiente cordial e asertivo, e as discusións que se produciron de seguro que serán os xermolos de novos proxectos e novas ideas para poñer en valor o noso rural, moi necesario sobre todo nunha época de cambios e crise.